Үл хөдлөхийн мэдээ, мэдээлэл

Сүхбаатар дүүрэгт шинэ орон сууцны үнэ хамгийн өндөр буюу 1м квадрат нь ₮5.92 сая байна.

Шинэ орон сууцны дундаж үнэ Баянзүрх дүүрэгт өмнөх оны мөн үетэй харьцуулахад 10.8 хувиар буюу нэг м.кв нь 436 мянган төгрөгөөр өсжээ Орон сууцны үнийн индекс гуравдугаар сард өмнөх оны мөн үеэс 9.3 хувиар өссөн бол өмнөх сараас 0.2 хувиар буурсныг Үндэсний статистикийн хороо танилцууллаа. Сарын дүнгээр орон сууцны үнэ хоёр сар дараалан буурсан байна. Шинэ болон хуучин орон сууцны үнийг өмнөх оны мөн үетэй харьцуулахад 8.1-9.5 хувиар өссөн ч өмнөх сартай харьцуулахад 0.1-0.4 хувиар буурчээ. Шинэ орон сууцны нэг метр квадрат талбайн дундаж үнэ 4.7 сая төгрөг байгаа бөгөөд Сүхбаатар дүүрэгт хамгийн өндөр буюу 5.9 сая төгрөг байна. Харин хуучин орон сууцны хувьд нэг метр квадрат талбайн дундаж үнэ 4.9 сая төгрөг хүрээд байгаа аж. Хан-Уул дүүрэгт хуучин орон сууцны үнэ өмнөх оны мөн үеэс 11.6 хувиар өссөн нь хамгийн өндөр өсөлт болжээ. Үүнээс гадна гуравдугаар сард 1-3 өрөө орон сууцны нэг сарын түрээсийн дундаж үнэ 1.3 сая төгрөгөөс 2.8 сая төгрөг байна. Өрхийн орлогын гуравны нэгийг орон сууц худалдан авах эсвэл түрээслэхэд зарцуулж байвал орон сууц нь иргэдийн худалдан авах чадварт нийцтэй гэж олон улсад үздэг. Харин Монгол Улсад иргэдийн орлоготой харьцуулахад орон сууцны үнэ 2-2.5 дахин үнэтэй байгааг СЭЗИС-ийн судалгаанд танилцуулж байсан юм. Үүнээс гадна ипотекийн зээлийн үлдэгдэл хоёрдугаар сарын эцсийн байдлаар 11.7 их наяд төгрөг хүрснээс 97.6 хувь нь хэвийн, 1.5 хувь анхаарал хандуулах, 0.9 хувь буюу 104.3 тэрбум төгрөгийн зээл чанаргүй ангилалд байгаа аж.